Rijiju-a'n Dimapur-ah kût a hawng

Union Minister of State for Home Kiren Rijiju chuan Thawh­lehni khan Dimapur-ah ‘Maati Ke Rang' festival a hawng.

Rijiju chuan festival chu sorkar laipuiin kût tam tak neihna hmun, Nagaland-ah a lakluh thu sawiin, Naga mite zinga hun a hmang thei chu lawmawm a tih thu a sawi.

North East Zone Cultural Centre (NEZCC) Dimapur-in culture hrang hrang pholanna atana ‘Maati Ke Rang’ festival an kalpui dan chu ṭha a tih thu sawiin, "Pangpar chi hrang hrangin pangpar huan a timawi a, hnam hrang hrang cultures chu inthliar hranna awm loin kan lawm tlang tur a ni," a ti.

"Hnam hrang hrang te an inzahtawn vekin ram a ropui ṭhin a ti a, hmarchhak bialin India ram state dangah zah a hlawh loh chuan India-in hma a sawn thei dawn lo a ni," a ti a, "Sakhua, hnam leh thurin vanga inthliar hranna chu kan pawmzam mai lo ang," a ti.

Union Minister Rijiju chuan sorkar laipuiin hmarchhak chanchin chu tam zawkin India ram chhunga school hrang hrangah thehdarh a, zirtir a tum thu a sawi bawk a, hmarchhak mite chu tihduhdahna tuartu an nih a phal loh thu a sawi bawk.

"Delhi aṭangin kan awmna hla mahse Delhi tan kan tê bik lo a, hmarchhak mite chuan kan awmna bial hi kan chaknaah kan hmang ṭangkai thiam tur a ni. Khaw­chhak lam aṭanga thlirin India chu hmarchhak bialah a inṭan a ni." a ti.

Rijiju chuan hmarchhak bial tan sorkar laipuia mawhphurtu a nih thu sawiin, hei vang hian hmarchhak bial hmasawnna bawhzui chu a mawhphurhna a ni, a ti. Kumthar hi hmarchhak bial leh Naga political issue chinfelna tura Naga mipuite tana hnathawh kuma a puan thu a sawi bawk.

Union Minister Rijiju chuan Prime Minister Narendra Modi hmalakna zarah Union Minister te chuan ni 15 danah hmarchhak bial an tlawh tur thu a sawi bawk. "Hmarchhak bialah minister te an kal hmasak chuan official te'n an hnung an zui dawn a, mipuite pawhin an hnung an zui thuai dawn a ni," a ti.

Nagaland Chief Minister T.R. Zeliang pawhin thu sawiin, hmar­chhak mite chuan an hmel danglam avangin India ram state dangah enhran an hlawh ṭhin thu a sawi a, Union Minister Rijiju kaihhruaina hnuaiah hmarchhak bial chu India ram tana hmun ṭangkai tak a nih a beisei thu a sawi.