NDFB(S) hel lakah beihpui thlak chhunzawm zel

Songbijit-a kaihhruai National Democratic Front of Boroland (NDFB-S) te lakah Assam police leh security force ṭangrualte chuan beihpui an thlak chhunzawm zel a, helpawlte tha chakna tichhe tura hun eng maw chen an la mamawh tur thu security force te chuan an sawi.

NDFB(S) helte hi nikum December 23-a Kokrajhar leh Sonitpur district-a mi 80 chuang tualthihnaah a mawhphurtu an ni.

Security force official chuan nikum December 23-a hel pawlte'n mi 80 chuang an thah hnu aṭangin an lakah ngawrh takin beihpui thlak a ni, a ti a, hel pawl hruaitu pahnih leh hel 55 man an nih tawh thu a sawi. Hetihlai hian December 23 tualthahna reltu nia rinhlelh NDFB(S) commander-in-chief G Bidai erawh a awmna chin hriat a la ni lo.

Official chuan an thudawn danin NDFB(S) helte hi Bhutan ram lamah an tlanchhia niin a sawi a, mahse Bhutan ramri an kân theih leh theih loh an hriat loh thu a sawi. Sorkar laipuiin Bhutan sorkar a ngen angin Bhutan Army te pawhin India force te thawhpuiin ramri-ah helho dapchhuah hna a thawk mek a ni.

Security official chuan hel ṭhenkhat chu silai dah ṭhain civil mite zingah an awm niin a sawi bawk a, mahse chung mite chu hun rei tak an inthup loh tur thu a sawi bawk.