India leh B’desh-in joint panel din an rel

India leh Bangladesh chuan ramri venhimna khauh zawka kalpui tumin, Joint Border Coordination Committee din an rel.

Meghalaya leh Bangladesh ramri district-a deputy commissioner te leh Bangladesh ram lama district paruk thuneitute'n ni hnih awh meeting Thawhṭanni leh Thawhlehnia an neihah he thutlukna hi siam a ni.

East Khasi Hills Deputy Commissioner Sanjay Goyal chuan joint panel din tura rawtna hi sorkar laipui leh Bangladesh sorkarah thlen an tum thu a sawi.

Ram pahnih thuneitute chuan ramri venhim kawngah tam zawka civil administration lam an inrawlh theih nan Joint Border Coordination Committee din an rawt thu Goyal chuan a sawi a, joint committee-ah hian ram pahnihte ramri district huamchhunga deputy commissioner, district police hotute bakah Revenue, Narcotics leh Customs department official te pawh telh an rel a ni.

"Tunah chuan Joint Border committee hi border force te chauhin an nei rih a, mahse thil tam tak chu border force te thuneihna piah lama ngaihtuah ngai a awm a, chung thilte chu administration lama thuneitute nen ngaihtuah ho a nih chuan ramri venhimna hi chak zawkin kalpui theih kan beisei a ni," tiin Goyal chuan a sawi.

Joint panel-ah hian Border Security Force (BSF) te leh Border Guard Bangladesh (BGB) te pawh teltir tum a ni bawk.

East Khasi Hills DC Goyal chuan committee chu din a nih chuan awmze nei zawka ramri venhim theih a rin thu a sawi a, ram pahniha DC te chuan ramri venhimnaa ṭangkai tur thu tam tak an inhriattir thei a ni, a ti.

Ramria pawikhawihna thleng ṭhin chungchangah Goyal chuan Bangladesh nen ṭangruala hmala turin thutlukna an siam thu a sawi bawk a, Bangladesh official te nen an contact number leh an official email id te pawh an inhrilh tawn thu a sawi bawk.