NPF MLA lungawi lote'n CM Zeliang paihthlak phût

Naga People’s Front (NPF) MLA lungawi lote chuan Chief Minister T R Zeliang-a kaihhruai sorkar chu ṭhiat a, G Kaito Aye kaihhruaina hnuaiah sorkar thar din turin Nagaland Governor P B Acharya an phût.

MLA lungawilote hian NPF president Shu­rhozelie Liezietsu chu paihthlaa, party aṭanga suspend tumin thutluk­na an siam bawk a, NPF president thar atan Noke Wangnao an ruat bakah secretary general thar atan Abu Metha an thlang bawk.

NPF MLA lungawilote hian tun hnaia Dimapur-a meeting an neih ṭumin he thutlukna hi an siam a ni.

Secretary general thar Metha-a'n thuchhuah a siamah meeting-ah hian member 430 an tel a, an zingah hian MLA 23 leh MP pahnih an tel bakah Assembly constituency unit 39 aṭangin unit president te, NPF youth wing leh women wing hruaitute pawh an tel a ni.

NPF-a lungawilote hian President Shurhozelie Liezietsu-a'n party aṭanga MLA pakua a suspend-na chu hnuhkir an tum thu an tarlang bawk.