Meghalaya : Dan loa hnathawktu endik ṭhinte lakah FIR thehlut

Meghalaya sorkar chuan dan loa state chhunga hnam dang hnathawk lo endik ṭhin tute lakah FIR pali a thehlut a, heng zingah hian Khasi Students' Union (KSU) pawh an tel a ni.

Chief minister Conrad Sangma chuan hetianga chet lakna hi dan kalh a ni tih sawiin, Labour department chauhin state pawn lam aṭanga hnathawk tura rawn lutte hi an endik thei tih a sawi.

KSU hian tun hnai aṭang khan Shillong chhunga hnam dang hnathawkte work permit an endiksak ṭhin a, hei hi Meghalaya chhunga Inner Line Permit (ILP) hman an duhna lantirna pakhat a nih bakah sorkarin pawn lam mi rawn lut dan nana Meghalaya Residents Safety and Security Act (MRSSA) a hman loh vang niin an tarlang. Chief Minister Sangma chuan mahni duh thua dan lo lekkawh ringawt ching pawl lakah sorkar chuan zah a ngai dawn lo a ni, a ti.

Conrad Sangma hian sorkar hriatpui work permit system Meghalaya-ah a awm loh thu sawiin hnathawka rawn kalte chu Labour department hnuaiah an inziak lut ṭhin a, hei hi a chhawrtu contractor-te mawhphurhna niin a sawi. ILP hman chungchangah sorkar laipui pawmpuina nghah a la ngai niin a sawi bawk.

MRSSA Amendment Bill 2020 hnuaia check gate siam chu union home ministry in a pawmpui theih lo tih Meghalaya sorkar a lo hrilh tawh a, hetiang check gate siam hian zin veivakte tan harsatna a siam theitu a nih thu an tarlang.

KSU hian kar liam ta Inrinni khan Ri Bhoi district-a National Highway 6-ah ILP check gate an lo siam tawh a, thuneitute nen inbiakna an neih hnuah helai hmun hi an chhuahsan leh a ni. Hemi hnuah KSU hian Thawhlehni aṭang khan Shillong khawpui chhunga state pawn lam mi hnathawka awmte an endik leh a, Laitumkhrah huamchhungah hnathawh phalna nei loa hna thawk mi 62 an man chhuak tih an tarlang. Hetianga mahni thua dan lo lekkawh tute lakah hian Meghalaya sorkar chuan hma a la ta a ni.