Nagaland : NST bus-ah a thlawnin PwDs-te chuang thei dawn

Nagaland sorkar chuan Nilaini khan hriattirna tichhuakin, Nagaland State Transport (NST) bus-ah rualban lohna nei, persons with disabilities (PwDs) te chu a thlawin an chuang thei dawn tih a tarlang a ni.

State transport department chuan persons with benchmark disabilities (PwBDs) te chuan a thlawna NST bus-a an chuan dawnin anmahni hriat hran nan department of empowerment of persons with disabilities, ministry of social justice and empowerment of persons with disabilities, Government of India emaw disability certificate pe chhuak theite siam, unique disability identify (UDID) card chu an neih a ngai dawn tih a sawi.

PwDs-te hian a thlawna chuang thei an ni tih hriat hranna turin free travel pass an nei dawn a, hei hi Dimapur-a NST general manager’s office aṭanga lak chhuah theih a ni ang. Anmahni kalpuitute erawh chuan bus chuan man hi a pangngaia an pek a ngai dawn thung. Hetihrual hian PwBDs zinga 80% aia sanga rualban lote emaw anmahni puih ngaite emaw kalpuitu zinga pakhat tan bus chuan man hi pek a ngai lo thung ang.

NST bus-a a khalhtu hnung chiaha ṭhutna tlar hnih, mi pali ṭhut theihna chu rualban lote tan hian hauh sak an ni dawn a, zin hma ni khat aia tlai loah ṭhutna hi hauh lawk ni se an duh tih tarlan a ni bawk. Transport department chuan a thlawna zin duh vanga rualban lo derte chu hrem an ni dawn tih tarlangin, free travel pass an pek chhuah dik lo taka hmang an awm chuan tihtawpsak an ni dawn tih an sawi tel bawk.