Hmarchhak hian khualzin hip turin theihna a nei : Union Tourism Minister

Union Minister of State for Tourism, Suresh Gopi chuan hmarchhak state-ten khualzin hip turin theihna an nei tih sawiin, sorkar chuan khualzin hip kawnga hmarchhak hmasawn nan kawng hrang hrangin hma an lak thu a sawi.

Suresh Gopi hian Tripura a tlawh ṭumin he thu hi a sawi a, thuthar thehdarhtute nen an inkawmnaah Neermahal, Sepahijala district a tlawh chungchang sawiin a vawi khat tlawhna a nih thu leh mawi a tihzia hahipin a sawi a ni. Khualzin hip thei hmun mawi dang an la neih ngei a rin thu leh, chung hmunte chei hnuma khualzinte tlawh tlaka siam chu an mawhphurhna a ni tiin a sawi.

Union Minister Gopi hian Tripura mai ni loin hmarchhak state dangte chuan khualzin hip turin theihna an nei tih a sawi bawk. "Vawiin hian Tripura theihna, haichhuah ni si lo ka hmu a ni. Khualzin hip turin a ṭul angin hma ka la ang" a ti. Tripura tourism minister Sushanta Chowdhury chuan khualzinte tlawh ṭhin lui leh dila dah tur lawng chu state sorkarin lei a tum thu a tarlang ve bawk. Chowdhury chuan union minister Gopi sawi angin Tripura mai ni loin hmarchhak huamchhungah, khualzin tam zawk hip thei turin hmalak a ngai niin a sawi.