HC-in rawtna thlen turin sorkar laipui a hriattir

Delhi High Court chuan chi inthliarna lam hawia hmarchhak mite chunga tharum thawhna thleng ṭhin ven nan sor­kar laipui chu rawtna thlen turin a hriattir.

Senior advocate Up­manyu Hazarika-a'n hmarchhak mite chunga tharum thawhna thleng a tawp loh thu leh sorkar laipuiin chak zawka hma a lak ṭul a thu High Court-a a thlen hnuah Chief Justice G Rohini leh Justice RS Endlaw te awmna HC bench chuan sorkar laipui chu rawtna thehlut turin a hriattir a ni.

Senior advocate Hazarika-a thu thlen chu High Court bench chuan pawm­in hemi chungchangah hian sorkar laipui chu hma latu tur a nih thu leh pawi­khawihna thlengte bawhzui kawngah High Court hnena thurawn petu tur a ni, a ti. Court chuan April 8 hian hearing a nei leh ang.

Sorkar laipui aiawhtu Additional Solicitor General Sanjay Jain chuan action-taken report (ATR) chu buatsaih mek a ni, a ti a, hemi rual hian High Court chuan pawikhawihna thleng zawng zawng chu chi inthliarna lam hawi a ni lo tih a hriat a ṭul a ni, a ti.

Hmarchhak mite himna chung­chang ngaituahtu, Bezbaruah committee rawtna thlente kaih­hnawihah sorkar laipui chuan a hmain ATR a lo thehlut tawh a, Committee rawtna siamte chu a taka kalpui a nih thu leh bawhzui zel a nih thu a tarlang bawk.

Sorkar laipui chuan nikum Feb­ruary khan hmar­chhak mite him­na chung­changa zirchianga, rawt­na siam turin M P Bezbaruah kaih­hruai­na hnuaiah committee a din a ni.

Bezbaruah committee chuan sorkar laipuiah phek 80-a chhah report a thehlut tawh a ni. Report chuan Delhi chu India ram khawpuiah hmarchhak mite tana him lo ber niin a tarlang a, he khawpuiah hian kum 2005 leh 2013 inkarah hmarchhak mi nuai hnih chuang an pemluh thu leh heng zinga 86 per cent-in chi inthliarna lam hawia tihduhdahna an tawrh thu a tarlang bawk.