Assam-in Bihu festival-ah ran sualtir a khap

Assam sorkar chuan district tina Deputy Commissioner te leh Guwahati Police Commissioner chu Supreme Court thuchhuak tlawhchhana hriattirna pein, ran sualtir leh intlansiak huaihawt khap turin a hriattir.

Assam Home Secretary and Commissioner L S Changsan chuan hemi chungchanga January 12-a khapna thuchhuah a siamah, thuchhuak chuan Magh Bihu Festival-a lâwi insualtir neih ṭhin pawh a huam a ni, a ti.

Changsan chuan Magh Bihu Festival neihna hmun hrang hrangah official te chu police duty tir vek turin a hriattir bawk a, insualtir atana ran an hmante leh a neitute chu man vek turin a hriattir bawk.

"Ran insualtir huai­hawttute bakah an ran te chu man vek tur a ni a, sorkar thuchhuak palzutna chu Supreme Court of India thuchhuak bawhchhiatna a ni ang," a ti.

Assam Home Secretary chuan Animal Welfare Board of India leh A Nagaraja te inkhinna kaihhnawihah Supreme Court-in May 7, 2014 khan ran sualtir khapna thupek a tihchhuah thu tarlangin, September 10 khan official te chu hma la tura a hriattir thu a tarlang bawk.

Animal Welfare Board of India leh Humane Society International/India chuan tun hnai khan ran sualtir khap turin Chief Minister Tarun Gogoi an lo ngen tawh a, sorkarin khapna thupek a chhuah chu lawmawm an tih thu an tarlang.

Humane Society International/India managing director N G Jayasimha chuan Nilainia thuchhuah a siamah, "Assam sor­karin ran sualtir khapna thupek a chhuah chu a lawmawm hle a, Deputy Commis­sioner te pawhin sorkar thupek chu a takin an lekkawh ngei kan beisei a ni," a ti.

Hetihlai hian ran sual­tir huaihawt ṭhinte chuan hmanlai aṭanga an lo chin tawh Magh Bihu Festival an lawm dan kalphung chu an hnuchhawn theih loh thu tarlangin ran an hman te'n hliam na an tawrh loh thu an tarlang.