IGNTUSU-in chaw ngheia nawrh huaihawt dawn

Indira Gandhi National Tribal University Students’ Union-Regional Campus Manipur (IGNTUSU-RCM) chuan state sorkarin an thil phutte a ngaihven loh avanga an lungawi lohna lantir nan January 16 aṭangin tiam chin awm loa chaw ngheia nawrh an tum thu an tarlang.

IGNTUSU-RCM hian a hmain state sorkarin infrastructure a siam­te a zawhfel theih loh avangin January 7-ah chaw ngheia nawrh an tum thu an lo tarlang tawh a, mahse a hun hi January 16-ah an sawn ta zawk a ni.

Zirlai pawlte chuan India ram puma tribal zirlai pawl hrang hrangte chu anmahni thlawp tura an ngen thu an tarlang bawk.

IGNTUSU-RCM chuan campus kalpawhna kawngpui siamṭhat mek chu peihfel thuai turin state sorkar an phut bakah building hrang hranga electric wiring leh tui pekna vuah zo thuai turin an phut bawk.

IGNTU-RCM campus-a main building te chu sak zawh an ni hlawm tawh a mahse luah theiha peihfel a la ni lo thung, hei vang hian zirlai pawlte chuan university chu a function thuai theih nan state sorkar nawr an tum thu an tarlang.