Delhi-in hmarchhak kût thleng dawn: DoNER Minister

Hmarchhak state pariat hnam thil leh kalphungte tarlanna atan Delhi-ah North-East festival huaihawt a nih tur thu Union Minister of State for Development of North Eastern Region (DoNER) Jitendra Singh chuan a sawi.

Hmarchhak kûtpui hi April-a neih theih beisei a ni a, tour operator, travel agent, cultural group leh lemchan lama tui mite an tel ang a, hmarchhak "Brand Ambassador" tur pawh ruat thuai a ni ang.

DoNER Minister Singh chuan hmarchhak zirlai leh tlawmngai pawlte hmaah he thu hi sawiin, DoNER minister hna a chelh aṭanga thla hnih chhungin hmarchhak Chief Minister te leh Governor te telna, North Eastern Council (NEC) meeting neih a nih thu a sawi a, meeting hi kum 10 chhunga a vawi khatna a ni, a ti.

Singh chuan meeting-ah hian hmarchhak biala hmasawnna project hrang hrang kalpui mekte ennawn a nih thu leh Delhi University south campus leh Hindu College bula hmarchhak zirlaite tana hostel hawn dan tur chung­changte an rel thu a sawi bawk.

Hmarchhak hmasawnna atana sum ruahman tawh, a hun taka hman a nih loh avanga la pekchhuah lohte pechhuak turin Finance Ministry a ngen thu a sawi bawk.