HC-in KHADC CEM thubuai siamsak

Meghalaya High Court chuan Nilaini khan KHADC Chief Executive Member (CEM) Adelbert Nongrum chu judge laka ṭawngkam mawi lo tak hmanga puhin thubuai a siamsak.

Justice SR Sen chuan Nongrum-a chu judiciary rorelna zah loa puhin High Court Registrar General hnenah thubuai ziaklut turin a hriattir a, India danpui Article 215 leh 266 bakah Contempt of Court Act, 1971 tlawhchhanin thubuai siamsak a ni.

High Court chuan KHADC CEM Nongrum-a'n January 8-a tualchhung English chanchinbu - The Shillong Times leh Meghalaya Times-a court rorelna chung­changa a lungawi loh thu a sawi tlawhchhanin report a buatsaih.

Justice Sen chuan KHADC CEM chu insawifiah tura hriattirna pe turin Registrar General a hriattir bawk.

"Hriattirna hi East Khasi Hills Deputy Commissioner kaltlangin chanchinbua news tarlan, photocopy nen pek tur a ni a, Deputy Commissioner pawh ni hnih chhungin affidavit thehlut tura ngen a ni bawk," tiin HC thu­chhuak chuan a tarlang.

"Respondent (KHADC CEM) chu January 27 hmain amah ngei inlanin court-ah a insawifiah tur a ni," tiin a tarlang bawk.

Justice Sen chuan chanchinbu report-a a lan danin Nongrum hian Judiciary tihhmingchhiat a tum bakah Judiciary a zah lohna a tilang a ni, a ti.

Nogrum hian KHADC huam chhunga Rangbah Shnong (Headmen) te thuneihna ṭhenkhat High Court-in a hlihsak chungchangah Justice SR Sen-a awmna, HC Division Bench-in thutlukna a siam danah thil inthup a awm a ni, a ti a, Rangbah Shnong te thuneihna chungchangah KHADC leh Rangbah Shnong te'n harsatna an chinfel hnuah High Court chuan thutlukna dang a siam leh a ni, a ti.

Justice Sen chuan, "Ka ngaihdan chuan Nongrum hian mipuite hruai kawi tumin fuihpawrh a tum a ni. Mi tu pawh Court thuthluknaah an lungawi lo a nih chuan Court-ah an zualko leh thei a, mahse Court puh hmingchhiat tumin an bei thiang lo a ni," a ti.