Nagaland cabinet-in special session neih a rawt

Nagaland assembly-a rorellai Naga People’s Front (NPF) party chhung­a buaina chinfel nan leh house-a sorkar fiah a nih theih nan Nagaland cabinet chuan Ningani khan special session neih a rawt.

NPF kaihhruai Democratic Alliance of Nagaland-III (DAN-III) sorkar thupuangtu Yitachu chuan he thu hi sawiin, state cabinet chuan assembly special session chu January 20-a neih a rawt thu a sawi.

Cabinet rawtna hi Go­vernor hnena thlen tur­in Assembly Secretariat-ah thlen a ni tawh bawk.

NPF MLA 22 lung­awi lote'n Chief Minister TR Zeliang-a kaihhruai sorkar an rintawk loh avanga bang tura an phut chungchanga harsatna chinfel nan assembly house chu sorkar fiahna hmun remchang ber a ni, tiin Yitachu chuan a sawi.

DAN-III thupuangtu Yitachu chuan Chief Minister Zeliang-a'n January 9 khan Governor PB Acharya chu special session ko tura a ngen tawh thu sawiin, Governor-in thutlukna a siam thuai loh avangin a nghah chhung a rei thu a sawi a, state mipuite hmakhua ngaiin cabinet chuan special session neih a rawt a ni, a ti.

Governor-in rawtna chu a pawmpui a rin leh rin loh chungchanga thuthar thehdarhtute zawhna chu Yitachu chuan chhangin, "Governor chuan duh­thlan tur dang a nei tawh lo a, special session a koh ngei a ngai a ni," a ti.

Yitachu chuan Chief Minister Zeliang-a'n DAN-III MLA tam zawk thlawp a hlawh thu sawiin, fiah­na a pal­tlang ngei a rin thu a sawi bawk a, assem­bly speaker tel loin NPF MLA 15, BJP MLA 4, NCP leh JD(U) MLA pakhat ve ve bakah Independent MLA pasarihin an thlawp thu a sawi bawk. NPF MLA lungawi­lote hruaitu, G Kaito Aye chuan thlawptu MLA 13 chauh a nei, a ti.

Hetihlai hian Kaito pawlte hian sorkar fiahna neih an duh loh thu leh hruaitu thlak an duh zawk thu an tarlang.