Tripura-ah ṭhelret chin tihlen tum

India rama ṭhelret mamawhna sang zelah sorkar laipui chuan mamawh phuhruk nan Tripura-a ṭhelret chin chu ngaihpawimawh a tum thu leh lian zawka kalpui a tum thu a tarlang.

Union Minister of state for Commerce and Industry Nirmala Sitharaman chuan he thu hi sawiin, India rama rubber mamawh phuhruk nan rampawn aṭanga lakluh a nih thu leh sorkar laipuiin Tripura-a rubber chinna a ngaihpawimawh thu a sawi.

"Tripura-a ṭhelret chinna chu ramngaw tichhe lo a, eng tia tihlen chi nge ni ang? tih chu sorkar laipuiin a ngaihtuah mek a ni," a ti.

Union Minister chuan Forest Rights Act kalpui dawn hun leh tribal te hnena ram pek a nih dawnin ṭhelret chinna chu ngaihpawimawh tur a ni, a ti. "

"Tribal te'n ṭhelret an ching duh a nih chuan ṭhelret tharchhuah theih hun, kum sarih chhung chu an khawsak inrelbawlna tur ngaihtuahsak an ni ang. Ṭhelret thar­chhuah kawngah Tripura chuan India ramah hmun pawimawh tak a luah mek a, hei vang hian state sorkar leh ṭhelret chingtute chu theihtawpa pui turin sorkar laipui a inhawng reng a ni," tiin Union Minister Sitharaman chuan a sawi bawk.

Ṭhelret hi hmarchhak bial bikah state pali- Tripura, Assam, Meghalaya leh Nagaland-ah te chin a ni a, ṭhelret huan hectare 103,500-a zau aṭangin kum khatah ṭhelret tonne 46,000 thar a ni.

Kerala-a Rubber Research Institute of India chuan hmarchhak biala ram hectare 450,000 chu ṭhelret chin­na atana ram ṭha tiin a chhinchhiah.

India rampumah ṭhelret hi ram hectare 600,000-a zauah chin a ni a, kum khatah ṭhelret tonne 750,000 thar a ni. Kerala chu state mala ṭhleret ching tam ber a ni a, Tripura chu a dawttu a ni. Tripura hian ṭhelret huan hectare 72,000-a zau aṭangin kum khatah tonne 40,000 a thar a, kum khatah cheng vaibelchhe 480 a la lut.