Manipur-a ADC te'n 6th Schedule-a dah an phût

Manipur-a Autonomous District Council paruk hruaitute chuan Churachandpur District Council chairman Langkhanpau Guite kaihhruaina hnuaiah Ningani khan New Delhi-ah Development of North Eastern Region (DoNER) Minister Jitendra Singh an hmu a, Manipur-a ADC te chu India danpui, Sixth Schedule-a dah an phût thu an thlen.

Manipur-a ADC palaite chuan District Council paruk chu kum 40 kaltaa, Manipur Hill Areas District Autonomous Councils Act 1971 pass a nih hnua din a nih thu tarlangin, mahse district council te hi Sixth Schedule-a dah an nih loh avangin state sorkar thuneihna hnuaiah dah an ni a, state sorkar chuan thuneihna tam zawk pek a duh lo a ni, an ti.

District Council te chuan an thil phut chu state sorkarah ṭum eng maw zat an thlen tawh a, mahse ngaihsak an hlawh lo a ni, tiin DoNER Minister hnenah an thlen.

District Council paruk palaite chu state sorkar chu Sixth Schedule-a awm lohna tura a ruka hma laah an puh a, DoNER minister chu an harsatna Prime Minister hnena thlensak turin an ngen.

DoNER Minister Singh chuan Manipur Hill area-a tribal te hmasawnna chu sorkar laipuiin a ngaihpawimawh thu sawiin, an harsatna chu a lo bawhzui tur thu leh District Council te tana a ṭha ber ngaihtuah a nih tur thu a lo hrilh.