KHADC-in state sorkar hnenah status report a dil

Khasi Hills Autonomous District Council (KHADC) chuan state sorkarin Sixth Schedule amend tura sorkar laipuia rawtna thlen a tum chung­changah nimin khan Chief Minister Mukul Sangma hnenah lehkha thawnin, status report an dil.

KHADC CEM Adelbert Nongrum chuan Ningani khan district council member all party meeting an neih hnuah Sixth Schedule amend tura rawt­na chungchangah sorkar laipui hnena status report an ngen hmain state sorkar hmalak tawhna, status report ngen hmasak ṭha a tih thu a lo sawi tawh a ni.

Nongrum chuan Sixth Schedule amend dan tur­ah April 8, 2012 khan KHADC-in state sorkar­ah rawtna a thlen tawh thu sawiin, rawtna an thlen zingah hian state sorkar leh district council te thuneihna huamchhung chhinchhiahna atan Sixth Schedule Para 12 (a) paihbo duhna te leh Autonomous District Council (ADC)-a seat 30 awm chu 65-a tipung tura rawtna te a tel thu a sawi.

ADC seat hi 65-a tihpun a nih chuan member panga chu nominate an ni ang a, member 60 chu a thlana thlan an ni ang.

KHADC CEM Nongrum chuan Chief Minister Mukul-a'n Sixth Schedule chungchanga all party meeting a kohah ADC member te a sawm lo chu mak a tih thu leh a lawm loh thu a sawi bawk.

Chief Minister Mu­kul-a'n nimina all party meeting a koh hi ṭhulh a ni a, meeting neih hun tur ruat a la ni lo.

Hetihlai hian eptu party te chuan Sixth Sche­dule amend dan tura ADC pathumin kum 2013-a rawtna an lo thlen tawh chungchangah state sorkar chu insawifiah tir an tum thu an tarlang.

United Democratic Party (UDP) general secretary Allantry F Dkhar chuan Sixth Schedule amend tur chungchanga state sorkarin Union Ministry of Home Affairs-a report a thehluhah ADC pathum rawtna siam chu a tarlang em tih eptu party-te'n an hre duh a ni, a ti.