Gogoi-a'n Jan 20-ah ministry a siksawi dawn

Assam Chief Minister Tarun Gogoi chuan January 20-a ministry a siksawi theih nan vawi­ina Council of Minister meeting neih hunah a minister-te bang turin a ngen dawn.

Congress party official chuan he thu hi sawiin, January 20-ah Governor a remchang a nih chuan Gogoi-a'n ministry thar siam a tum thu a sawi a, ministry thara cabinet minister turin Chandan Sarkar, Sukur Ali, Dr Bhumidhar Barman, Girindra Mallik, Ajit Singh, Etowa Munda, Bismita Gogoi, Ajanta Neog, Rockybul Hussain, Sumitra Patir, Sarat Barkotoky, Dr Nazrul Islam leh Basanta Das te ruat an nih rin thu a sawi bawk.

Minister aṭanga paihthlak turte chu Power, Industries and Commerce, Education Minister Pradyut Bordoloi, Agriculture leh Parliamentary Affairs Minister Nilamani Sen, Public Health Engineering Minister Gautam Roy, Planning and Development Minister Tanka Bahadur Rai, Labour and Employment Minister Prithivi Majhi, Cultural Affairs, Handloom and Sericulture Minister Pranati Phukan, Social Welfare Minister Akon Bora leh Minister of State for Water Resources Rajiv Lochan Pegu te an ni.

Minister paihthlak turte bialah hian nikum Lok Sabha inthlan khan Congress party-in vote an hmuh chhiat avangin minister te hi an nihna aṭanga paihthlak tum a ni, tiin party official chuan a sawi a, ministry tharah Chief Minister Gogoi-a'n minister post pali tihruah a tum thu a sawi bawk.

Ministry thar siam tur­ah hian Ministers of State ni lai- Chandan Sarkar, Sumitra Patir, Sukur Ali leh Etowa Munda te chu cabinet minister-a dah an nih tur thu a sawi a, mahse heng minister te hian nikum Lok Sabha inthlanah Congress party chu an bialah an chakpui bik lo, a ti.

Nikum Lok Sabha inthlanah Cabinet Minister te'n an bialah Congress party an chakpui zawh loh chuan minister an nihna aṭanga paihthlak an nih tur thu sawilawk a nih lo tih official chuan a sawi bawk.