CM Tuki-a'n hmarchhak biala thlawhtheihna service tihtam a duh

Arunachal Pradesh Chief Minister Nabam Tuki chuan hmarchhak biala thlawhtheihna service tihchangtlun a duh thu sawiin, thlawhtheihna tam zawk thlawh tir a duh thu a sawi.

Tuki chuan he thu hi tun hnaia Union Tourism Minister Mahesh Sharma a hmuh ṭumin a sawi.

Chief Minister Tuki chuan tunah hian Assam, Lilabari Airport aṭangin Allianz Air chuan North Eastern Council (NEC) hmalakna hnuaiah ATR thlawhtheihna a service tir a, heng thlawhtheihna service hi Brahmaputra lui hmar lama mite leh Arunachal Pradesh mite mamawhna phuhruk tura service an ni, a ti.

Tuki chuan an state khawpui, Itanagar-in Airport puitling a la neih loh avangin Assam, Lakhimpur district-a Lilabari airport chu state mipuiten inghah nan an hman thu a sawi bawk. Lilabari Airport hi Itanagar aṭanga kilometer 72-a hla a ni.

"Allianz Air te thlawhtheihna service hian mipuite mamawhna a phuhruk zo lo hle a, thlawhtheihna chhuak a mumal loh bakah thlawhtheihna thlawh chhuah hun a mumal lo hle," a ti.

Tuki chuan Union Minister of state for Civil Aviation ni bawk, Tourism Minister Sharma chu Lilabari leh New Delhi inakarah kar khatah vawi li thlawhtheihna lian service tir turin a ngen a, hemi atan hian private operator te pawh a ṭul anga biak sak turin a ngen bawk.