Kar hnih danah Union Minister te'n hmarchhak state an tlawh thin ang

Sorkar laipuiin hmarchhak biala hmasawnna project a kalpui mekte a hmuna enpui turin Union Minister pariat chuan kar hnih danah hmarchhak state pakhat an tlawh ṭhin dawn a, Union Minister zingah hian DoNER Minister Jitendra Singh leh Civil Aviation Minister Ashok Gajapathi Raju te pawh an tel.

He thu hi DoNER Minister Singh chuan sawiin, Prime Minister Narendra Modi-a'n hmarchhak bial a ngaihpawimawh avangin he hun hi buatsaih an ni, a ti. Hmarchhak state an tlawhin Union Minister te chuan an department enkawl hnuaia project kalpui mekte an enpui ṭhin ang.

DoNER Minister Singh chuan tun thlaah Union Minister of Mines and Steel Narendra Singh Tomar, Law and Justice Minister D V Sadananda Gowda, Civil Aviation Minister Ashok Gajapathi Raju, Minister of State for Drinking Water and Sanitation Ram Kripal Yadav leh Minister of State for Agriculture Sanjeev Kumar Balyan te'n hmarchhak state pariat an tlawh tur thu a sawi.

Singh chuan Water Resources Minister Uma Bharati, Chemicals and Fertilizers Minister Ananth Kumar, Minister of Social Justice and Empowerment Thaawar Chand Gehlot leh Minority Affairs Minister Najma Heptulla te chu thla leha hmarchhak bial fang kual tura a sawm thu a sawi a, Minister of State for Planning Rao Inderjit Singh, Minister of State for Railways Manoj Sinha leh Minister of State for Road Transport, Highways and Shipping P Radhakrishnan te chu February thlaa a thawh hnihnaah hmarchhak tour nei tura a sawm thu a sawi bawk.

Home Minister Rajnath Singh, Commerce Minister Nirmala Sitharaman, Minister of State for Youth Affairs and Sports Sarbananda Sonowal leh Minister of State for Home Affairs Kiren Rijiju te chuan January thla hian Meghalaya, Tripura, Assam leh Nagaland an tlawh tawh.

Singh chuan thla tin hmarchhak state pakhat tlawh a tum thu a sawi.