Rampawna pawisa transfer-ah CM Zeliang an puh

Nagaland-a rorellai Naga People`s Front (NPF) MLA lungawi lote'n bang tura Chief Minister TR Zeliang an nawrna chu a zual zel a, NPF MLA lungawi lote hian kar kalta khan Chief Minister chu rampawn bank account-a pawisa khawih che-ah an puh.

MLA lungawi lote hruai­tu G. Kaito Aye leh Noke Wangnao chuan thuchhuah an siamah Chief Minister an puhna hi tarlangin, "Hong Kong leh Kuala Lampur-a T.R. Zeliang leh a nupui bank account-ah Singapore aṭang­in pawisa a lut ngei tih fin­fiahna pawh kan nei a, pawisa lut hi cheng vaibel­chhe 78 chuang a ni," an ti.

Singapore pawisa, cheng 70,00,000 chu Royal Bank of Canada (Hong Kong)-a TR Zeliang account-ah August 16, 2014 khan a lut a, pawisa thawntu hming hi Ramasamy Veeran a ni, tiin Kaito leh Noke thuchhuak chuan a tarlang a, Zeliang-a nupui, Kevizenuo Rangkau account-ah pawh September 26, 2014 khan Singapore pawisa cheng 1,00, 08,500 a lut leh bawk a ni, an ti.

"Rampawna sum chhep­relhte hi Zeliang-a leh pawlte chuan MLA te lei nan an hmang a, Nagaland leh a mipuite dikna chanvo chu an zuar a ni. Minister ṭhenkhat leh politician te chuan a rukin ram rawng an bawl a, an mimal hlawkna atan sum tam tak an siam ṭhin a ni," tiin thuchhuak chuan a tarlang bawk.

Hetihlai hian Chief Minister Zeliang chuan an puhna chu a pha thung a, India rampawna bank account a neih loh thu leh amah puhtute chuan tu bank account chanchin nge an sawi a hriat loh thu a sawi bawk.

Zeliang chuan an puhna chu chhuichian a ngam thu leh a chhuitute chu thawhpui a hreh loh thu a sawi. "NPF MLA lungawi lote hian min puhnaa finfiahna rintlak an nei tur a ni a, an nei lo a nih chuan inpuhhmingchhiat tumna thubuai ka siamsak a ngai ang," a ti.