Assam : Tuilianin ziaawm lam a pan

Assam chu tuilian avanga June thla aṭanga an buai hnuah state chung hmun hrang hrangah tuilian hian ziaawm lam a pan ṭan. Assam-a lui liante, a bikin Brahmaputra leh Kushiyara chuan hlauhawm chhinchhiahna la pel mah se tuilian chhinchhiahna sang ber an pel tawh lo a, lui dang tui pawh a kam ṭan a ni.

State chhung tuilian hian kam lam pan mah se tuilian hian nghawng a la ngah hle a, district 27 huamchhunga khaw 2,580 a la nghawng mek a ni. Assam State Disaster Management Authority (ASDMA) in a tarlan danin, kuminah tuilian vanga nunna chan hi mi 84 an tling tawh a, mi nuai 14 nunphung a la tikhaihlak a ni. Kumin chhungin khuarel chhiatna hrang hrang vanga thi 100 an tling tawh tih tarlan a ni bawk.

Tuilian hian chhiatna hrang hrang a thlen bakah loneitute a tibuai hle a, thlai chinna hmun hectares 40,000 chuang a chim pil a ni. Tuilian tuarte chhawmdawl nan hian district 20-ah relief distribution centre siam niin, chhawmdawlna-in 365 din a ni tawh a, mi nuai 1.57 an cheng mek a ni.

Mihring bakah nungchate pawh tuilian vanga thi an tam hle a, Kaziranga National Park (KNP) director Sonali Ghosh chuan park chhunga ramsa 174 an thi tawh tih tarlangin, heng zingah hian samak 10 an tel tih a sawi. KNP hian kum 2017 khan tuilian a la tuar nat ber ṭum tawngin, ramsa 291 in an thih phah a, heng zingah hian samak 24 an tel tih Ghosh chuan a sawi. Ran vulh lai nuai 11 chuang tuilian hian a nghawng bawk a ni.

State pum huapin tuilian hian ziaawm lam pan mah se hmun ṭhenkhat erawh tuilian vang hian an la buai chhunzawm zel thung, state chhunga lui lian ber Brahmaputra lui tui chuan Nimatighat, Tezpur, Guwahati leh Dhubri-ahte hlauhawm chin a la pel a ni. Brahmaputra fintu Burhidihing chuan Chenimari-ah hlauhawm chhinchhiahna hi pel ve bawkin Disang lui pawhin Nanglamuraghat-ah a la pel bawk. Barak fintu Kushiyara chuan Karimganj-ah hlauhawm chhinchhiahna a la pel tih ASDMA chuan an tarlang.