Manipur : CM-in NRC an thlawp vangin Kuki Inpi a fak

Manipur chief minister N Biren Singh chuan state chhunga National Register of Citizens (NRC) kalpui tumna Kuki Inpi Manipur (KIM) in a thlawp avangin a fak hle a, KIM thutlukna chu Manipur chhunga remna leh muanna a awm theih nan kawng hawngtu a ni thei niin a sawi.

Sorkar aṭanga hamṭhatna dawngtute pualin Ningani khan City Convention Centre-ah hun hman niin, hetah hian CM Biren Singh hian thu sawiin NRC kalpui chungchanga KIM ṭanna sawichhuakin, NRC kalpui an thlawp vanga a lawm thu a sawi a ni. Manipur CM chuan he thutlukna hi hmalam hun atan a pawimawh dawn tih sawiin tualchhung buaina chin fel nan kawngro su thei a ni, a ti.

KIM hian NRC kalpui chungchangah hian an ngaihdan an sawhsawn a, a hmaa an dodal chu India danpui hnuaia dik taka kalpui a nih dawn chuan Kuki-Zo chenna hmuna NRC kalpui chu an thlawp tih an tarlang a ni.

Kuki hnamte chu inbiakna nei turin Biren Singh chuan a sawm a, amah emaw sorkar laipui hnenah emaw NRC kalpui chungchanga an ngaihdante sawifiah turin a ngen a ni. CM hian state chhunga ruihhlo tawlh ruk hluar lutuk leh dan loa pem lut an tam lutuk chu buaipui a ngai tih sawiin, ramngaw humhalh a ngaihzia pawh a sawi lang bawk.

Biren Singh hian tualchhung buaina vanga nunna chante chu martar an nih thu sawiin, hun rei tak aṭanga an ngiat tawh Armed Forces Special Powers Act (AFSPA) hlih leh Inner Line Permit (ILP) hman chungchang pawh BJP sorkar chuan a ngai pawimawh tih a sawi bawk. "Manipur mipuite hian AFSPA nghawng an tuar rei tawh hle a, remna leh muanna awm theih nan inthlakthleng a ngai a, hmalam pana kal a hun tawh a ni," Biren Singh chuan a ti.