Sikkim : Pisa kai hun vawn dik theih nan sorkarin hma la dawn

Sikkim sorkar hnuaia department of personnel chuan nimin khan hriattirna tichhuakin, sorkar hnathawk pisa kai hun chungchangah sorkar chu khauh lehzualin a kal dawn a ni. Hemi bakah hian thla khata Inrinni vawi hnihna leh vawi lina chu sorkar chawlh pangngai a ni tawh dawn tih tarlan a ni bawk.

Sikkim chhunga sorkar pisaah chuan chawhma dar 10 aṭanga tlai dar 4:30 thleng hnathawh hun a nih thu chuanna thuchhuahah Sikkim sorkar hnuaia department of personnel secretary chuan a hming a ziah hnan a ni. Hemi hunchhung hian sorkar hnathawkte chu a hun takah an thlengin an haw tur a ni a, chhan ṭha tak nei loa pisa kai tlai leh ban hmaa hawte chu an leave khawl sa aṭangin ni chanve paihsakin casual leave angin a kal ṭhin dawn a ni. Chawlh dil loa pisa kai lote chu an casual leave aṭangin nikhat paihsak an ni bawk ang. Sorkar hriattirna chhuahah hian SMS emaw WhatsApp kaltlanga chawlh dilna thehluh chu tih loh hram ni se tiin, a theih chinah lekhaa ziak ngeia thehluh theih ni se an duh tih tarlan a ni bawk.

Sorkar hnathawk zingah kal tlai leh haw hma an awm ṭhin chu sawiselna a tam hle a, hemi chungchang ching fel tur hian sorkar chuan hma a la ta a ni. Pisa kai hun vawn dik loh vang hian sorkar hmalakna duh anga a chak tawk loh bakah mipuite chuan an tuar nia tarlan a ni. Sorkar thuchhuak chuan pisa kai hun an vawng dik ngei a ni tih finfiah turin, department hotute ṭheuh chu an hnuaia hnathawkte hrilhlawk loa endik ṭhin turin a chah. Sorkar hian pisa kai chungchang bakah Sikkim chhunga sorkar hnathawkte tan Inrinni vawi hnihna leh vawi lina chu sorkar chawlh a ni tawh dawn tih a tarlang tel bawk. Hetianga chawlh an neih chhan hi sorkar hnathawkte tan a ni a, an hnain an nunphung a nghawng nat loh nana ti an ni.