GNLA chairman a bang

Garo National Libera­tion Army (GNLA) chairman jail tang mek, Champion R Sangma chuan Pa­thianni khan social media kaltlangin chairman a nihna aṭanga a ban thu a puang.

GNLA chairman Cham­pion ban thu hi GNLA public relations secre­tary hlui, Garo Mandei Ch Marak-a Facebook account-ah tarlan a ni.

Hetihlai hian Meghalaya-a chanchinthar thehdarhtute chuan Facebook kaltlanga Champion-a thu sawi hi rintlak a nih leh nih loh an fiah theih loh thu an tarlang.

Facebook-a thuchhuak chuan GNLA Chairman post chu a ruah thu a tarlang bawk a, sorkar nen remna zawnga inbiakna neih a nih hunah GNLA chuan chairman thar a ruat a ṭul tur thu a tarlang bawk.

"GNLA Chairman Champion Sangma chuan Facebook kaltlangin a ban thu a tarlang a, mahse Asim-a GNLA headquarters chuan banna lehkha an la dawng lo. A bang tak tak nge jail aṭanga a chhuah theih nan a ti tih erawh kan hre lo," tiin Facebook account neitu, Garo Mandei Marak chuan a sawi.

Chairman a ban tak avang hian GNLA chuan nitina an inrelbawlna buaipui turin member 15 awmna, 'decision making body' an din nghal. Body tharah hian vice-chairman Mikim Marak, commander-in-chief Sohan D Shira (Wegara), deputy commander-in-chief Toding Marak, general secretary Raka Marak, joint secretary Matchang Shira, organising secretary Renggok K Sangma, public relations secretary G L Dm N Marak, chin hriat loha awm mek grievances and redressal secretary Jakpil T Sangma, finance secretary Rakkam Ch. Marak, foreign secretary Millam R Marak leh jail tang mek political secretary Bikdot Nikjang Marak te an tel a ni.

GNLA Champion Sang­ma hi kum 2012-a Bang­ladesh-a man a nih hnuah Meghalaya-ah lak a ni a, jail-a dah nghal a ni.