Naga hmeichhe naupangin bravery award dawng dawn

Naga hmeichhe naupang, Mhon­beni Ezung chu national bravery award dawng tura thlan a ni.

Kum riat mi, Mhonbeni hian a pi tui tla a chhanchhuah vanga naupang huaisen chawimawina dawng tura thlan a ni a, kumin Republic Day puala India rama naupang huaisen chawimawina dawng tur 24 thlanchhuah zingah hmarchhak aṭanga naupang pali tlanchhuah zinga hmeichhe awmchhun a ni.

Mhonbeni leh a pi chuan nikum January khan Wokha district-a Anunga luiah kalin, sangha an man a, a pi hi tui feet nga vela thukah tla sual palhin, Mhonbeni hian rei tak a beih hnuah a chhanchhuak a ni. A pi a chhanchhuah hnu hian khaw lam panin a tlan nghal a, tualchhung mipuite punin, a pi hi damdawi inah an dah nghal a ni. He thil thleng vang hian Mhonbeni hi huaisen chawimawina dawng tura thlan a ni.

Mhonbeni chuan chanchinbu mite zawhna chhangin, thil thleng chu a hlauh loh thu leh a pi a hmangaihnain a rilru a luah zawk thu a sawi a, chhanchhuah ngei a ṭul a ni, a ti.

National bravery award hi Indian Council for Child Welfare chuan kum 1957 khan buatsaih ṭanin, kumtin naupang huaisen tlanchhuahte hnenah chawimawina thuziak leh medal a hlan ṭhin. Award hi buatsaih a nih aṭangin naupang huaisen 895-in an dawng tawh a ni.

Chawimawina dawng tura thlan­chhuah naupang te hi Prime Minister Narendra Modi-a'n chawimawina a hlan ang a, Republic Day lawmna, Rajpath, New Delhi-ah Republic Day parade-ah teltir an ni bawk ang.

Indian Council for Child Welfare chuan huaisen chawimawina a hlan naupangte hi school an kal chhungin an senso a tumsak bawk ang.