Tourism Ministry-in Demwe Lower project a dodal

Union Tourism and Culture Ministry chuan Arunachal Pradesh, Lohit luia power megawatt 1750 pechhuak thei, Demwe Lower Hydroelectric Project kalpui tur chu an duh loh thu an tarlang.

Demwe project hi Hin­du sakhaw hmun pawi­mawh, Parashuram Kund bula din tur a nih vangin Union Tourism Ministry hian a dodal a ni.

Union Minister of State for Tourism and Culture Mahesh Sharma chuan December 22, 2014-a Union Minister of State (Independent Charge) for Environment, Forest and Climate Change Prakash Javadekar hnena lehkha a thawnah Demwe project hi an dodal thu a hriattir.

"Project hi kalpui a nih chuan truck load 23 chuang bawlhhlawh leh hnawmhnawk a siam chhuak dawn a, hei hi Parashuram Kund tan a him lo a, sakhaw hmun pawimawh hi bawlhhlawh paihna hmunah a chan a hlauhawm a ni. Demwe Lower Hydroelectric Project atana tuikhuah chu Parashuram Kund tan a hlauhawm thei bawk a, helai hmun hi Tourism leh Cultural thlirna aṭangin hmun pawimawh ve ve a ni," tiin Union Tourism Minister Shar­ma chuan Union Environment Minister Javadekar lehkha a thawnah a tarlang.

Union Tourism Minister chuan Parashuram Kund hmuna Tourist Complex din nan Ministry of Tourism-in Arunachal Pradesh sorkar hnenah cheng nuai 462.68 a pek tawh thu a tarlang bawk a, heng pawisa hi kum 2007-08-a pek­chhuah a nih thu leh state sorkarin a hman tawh thu a tarlang bawk.

Parashuram Kund pawimawhna tarlangin Tourism Minister Sharma chuan Manipur, Assam leh rampawn - Nepal aṭang tein Hindu sakhaw puithiam leh sakhaw zuitu mi eng maw zatin January thlaa ‘Makar Sankranti’ hun laiin kum tin an pan ṭhin tih a sawi.

"Tualchhung mite pawhin Demwe Project hi dodalin, National Green Tribunal (NGT)-ah an thlen ngei ka ring a, mahse tunah hian project chawlh tir tura thuchhuak engmah a la awm lo a ni," a ti.

"Ministry of Tourism and Culture-in Demwe Project a dodalna hi National Green Tribunal hnena min thlensak ngei turin ka ngen bawk a che," tiin Union Minister Sharma lehkhathawn chuan a tarlang bawk.

Hetihlai hian National Green Tribunal-in Demwe Project kaihhnawiha environment clearance dodalna petition a ngaihtuah ṭumin Environment Ministry chuan Ministry of Tourism-in project a dodalna hi a tarlang lo a, NGT chuan petition hi a hnawl a ni.

Demwe Lower project-a tuikhuah hi metre 124-a sang a ni ang a, Parashuram Kund chhak lamah metre 800-a hlaa awm a ni.