Assam Forest Minister lakah DBMASM an lungawi lo

Assam-a NGO, Durniti Birodhi Manab Adhikar Suraksha Mancha (DBMASM) chuan Assam Forest minister Rockybul Hussain-a'n tualchhung television channel-a Krishak Mukti Sangram Samiti (KMSS) president Akhil Gogoi a sawisel danah an lungawi loh thu an tarlang.

DBMASM president Pradip Baruah chuan Forest Minister hnena open letter a thawnah Forest Minister Hussain-a'n Forest Minister a nihnaah za-ah za a hlawhtling tia a sawi chu mak a tih thu a sawi a, a hlawhtlinna chu Assam-a samak kahhlum ṭhin te humhalh kawnga lantir zawk turin a hrilh.

Baruah chuan Wildlife Protection Act 1972 chu sorkar laipuiin kum 2009-ah a amend tawh thu sawiin, Criminal Procedure te ennawn a nih hnuah forest guard te chu silai hman phalsak an nih thu a sawi. Wildlife Protection Act lekkawh a nih hnu, kum 2010 aṭangin vawiin kumin thlengin samak te chu kahhlum an la ni, a ti a, tun thla pawh hian samak pali kahhlum an nih tawh thu a sawi bawk.

KMSS hotu Akhil Gogoi-a'n phalna nei lote'n balu truck load eng maw zat an phur­chhuah thu leh Chhaygaon Kukurmara hmunah truck pakhatin cheng 200 an chawi tih a sawi chungchangah Forest Minister chuan tualchhung television channel kaltlanga chhangletin, Akhil Gogoi chuan finfiahna a nei a nih chuan court-ah thlen rawh se, a ti a, hei hian DBMASM te a tilungawi lo hle.

DBMASM president thuchhuak chuan Forest Minister chu a mawhphurhna midang kuta pek tumah puhin, hei hian Forest Minister dik tawk loh zia a tilang, an ti.