Assam minister te an bang CM-in cabinet siksawi dawn

Assam Chief Minister Tarun Gogoi chuan Thawhṭanni khan Council of Minister meeting koin, cabinet siksawi a nih theih nan minister te'n banna an thehlut.

Cabinet siksawi tur hi Gogoi-a kaihhruaina hnuaiah kum 14 chhunga a vawi khatna tur a ni. Gogoi-a kaihhruai Congress party hian kum 2011 state assembly inthlana hnehna an chan aṭangin vawiin thlengin Assam-ah ro an la rel a ni. State assembly inthlan hi nakkumah neih a ni ang.

Congress party hian kum 2006 leh 2011 assembly inthlanah hnehna chang mah se kum li kalta chhung khan party MLA te lungawi lohna ṭum eng maw zat a thleng a, MLA lungawi lote hian party hruaitu thlak an phut bakah cabinet siksawi an phut a ni.

Thawhṭannia meeting neihah hian Power and Industries Minister Pradyut Bordoloi, Cultural Affairs Minister Pranati Phukan leh Social Welfare Minister Akon Bora te an tel lo a, mahse banna lehkha erawh an thawn a ni.

PHE Minister Gautam Roy chuan, "Ministry siksawi a nih theih nan vawiin khan banna kan thehlut a, Congress mi leh sa rinawm tak ka nih vangin mawhphurhna min pek chu eng pawh ni se lawm takin ka pawm ang," a ti.

Congress party official chuan Minister pariat thlak an nih tur thu sawiin, cabinet siksawi chu Zirtawpnia an tihfel hman a beisei thu a sawi.