March thla tawpah BTAD inthlan buatsaih dawn

Assam State Election Commission chuan Bodoland Territorial Autonomous District Council (BTAD) inthlan vawi thumna chu March thla tawpa buatsaih a tum thu a tarlang.

BTAD term hi kumin April 23-ah a tawp dawn a, mahse state election commission chuan term tawp hmain inthlan buatsaih a tum thung.

State Election Commissioner H.N. Bora, IAS (Retd.) chuan BTAD inthlan kaihhnawihah hian Thawhṭanni khan all party meeting a ko a, inthlan chu March thla tawp lama buatsaih a nih tur thu leh sorkar thar chu April thla tira Bohag Bihu kût neih hmaa lakluh hman an duh thu a sawi.

Meeting-ah hian political party hrang hrang aiawhte bakah IGP (Law & Order) S.N. Singh, Joint Secretary (WPTBC) Milton Queah, Joint Secretary (Revenue) Madan Chandra Deka leh Principal Secretary (BTC) Anupam Kr. Roy te an tel.

BTAD member 40 awmna inthlan neih turah dik leh felfai taka inthlan neih a nih theih nan political party hrang hrang te'n rawtna an thlen bawk.

Kum 2003, February-a Bodo Liberation Tiger (BLT) leh sorkar laipuiin Bodo Peace Accord an ziah tlawhchhana India danpuia Sixth Schedule siamṭhat a nih hnuah Bodoland Territorial Autonomous District Council hi din a ni a, kum 2005 khan inthlan hmasa ber neih a ni. Bodoland People’s Front (BPF) chuan inthlan hmasa ber leh inthlan vawi hnihna, kum 2010-a neihah hnehna changin, Bodo Council-ah vawiin thlengin ro an la rel. BPF hi Bodo hel pawl, Bodo Liberation Tiger (BLT) aṭanga piang a ni.