Arunachal chungchanga Japan FM thusawi China-in a helh
Japan Foreign Minister Fumio Kishida-a'n tunhnaia India a rawn tlawh ṭuma Arunachal Pradesh hi India ram bung khat a ni, tia a sawi chu China chuan a pawm theih loh thu tarlangin, sawifiah turin Japan a phût.
Chinese Foreign Ministry thupuangtu Hong Lei chuan Japan FM thusawi chu China-in a ngaih thutak hle a, hemi chungchang hi sawifiah turin Japan kan phur a ni, a ti.
Japan FM Kishida chuan January 17 khan New Delhi-a thuthar thehdarhtute a kawmnaah, Japan-in Arunachal Pradesh-a infrastructure project atan investment tih a hreh nia sawi chungchangah China nena ram inchuh thubuai vang a ni em tia thuthar thehdarhtute zawhna chu chhangin Japan chuan hmarchhak biala inkalpawhna tihchangtlun chu a duh thu sawiin, mahse a bika Arunachal Pradesh ṭanpui an tum loh thu a sawi.
"Hmarchhak state zingah Arunachal Pradesh hi a bikin in lo sawi lang a, Arunachal hi India ram bung khat a ni a, China nena ram inchuh thubuai neihna chhan pakhat a ni bawk. Tunah chuan Japan-in a bika ṭanpui tumna a nei lo," tiin a sawi.
China Foreign Ministry thupuangtu Hong chuan Arunachal Pradesh chu China-in Tibet chhim lam ram tiin, a ram a ni, a ti a, Japan FM thusawi hi tun hmaa Japan ṭanhmun nen a danglam ta a ni, a ti.
"Japan chuan China leh India ram inchuh thubuaiah a inrawlh loh tur thu a lo sawi tawh a, Arunachal Pradesh-a infrastructure project-ah pawh inrawlh a tum loh thu nikum khan chiang takin a sawi tawh bawk a ni," tiin Hong chuan a sawi.