DoNER-in 'Make in North-east' Campaign a tlangzarh dawn

Development of North Eastern Region (DoNER) Ministry chuan 'Make in North-east' campaign tlangzarh a tum thu leh hmarchhak bial brand ambassador ruat a nih tur thu DoNER Minister Jitendra Singh chuan a sawi.

DoNER Minister Singh chuan ‘Make in North-east’ atana ruahmanna an siam zingah an hmalakna hmasa atan tourism tihchangtlunna tur an ngaihtuah tur thu leh, hmarchhak bial brand ambassador atan India rampuma hmarchhak mite nun zia pholang thei tur ruat a nih tur thu a sawi bawk.

Singh chuan DoNER Ministry leh Tourism Ministry-a official te nena meeting an neih kaihhruaiin, sorkar laipuiin 'Make in India' policy a kalpui zulzuiin ‘Make in North-east’ policy pawh kalpui a nih tur thu a sawi a, ‘Make in North-east’ ruahmanna chuan hmarchhak biala thingpui tharchhuah te, organic farming kalpui mek te, food processing te leh ramhmul damdawi siamchhuah te a tihchangtlun kan beisei a ni, a ti.

DoNER Minister chuan hmarchhak biala investment tam zawk hip nan investor te chanchin kimchang tarlanna buatsaih a ni ang a, India rampumah tlangzarh a ni ang, a ti a, khualzin mite hip nan Tourism Ministry hnuaiah project lian tham tak buatsaih a ni dawn tih a sawi.

Singh chuan hmar­chhak bial hmasawnna atana a hmathlir tarlangin, film indus­try te'n hmarchhak bial chu lemchanna atana hmun remchang a ni tih an hriat theih nan Mumbai-ah khawmpui buatsaih a tum thu a sawi. Film shooting chu rampawna chhuah ngai lo leh man tlawm zawkin hmar­chhak biala neih theih a ni, a ti.

Mumbai-a film siamtute zinga tih tak zeta hmar­chhak bial tarlang ṭhin chu Dev Anand (L) chauh a ni, tiin DoNER Minister Singh chuan a sawi bawk a, 'Make in North-east' hnuaia hmalakna chuan hmarchhak bial tan sum ringawt hailut loin, ṭhalai hna neilote tan hna thawh tur a siamsak bawk ang, a ti. India ram state danga hna zawnga hmarchhak ṭhalai tam tak chhuak ṭhin chu a veng dawn a ni, tiin a sawi bawk.

DoNER Minister Singh chuan hmarchhak biala inkalpawhna tihchangtlunna atana thlawtheihna service tam zawk petu airline leh Bollywood film shooting neite chu special incentive pek an nih tur a sawi a, hmarchhak ṭhalaite tana hna thawh tur tam zawk an siam theih nan DoNER Ministry-in industry hrang hrangte chu hmarchhaka hipluh an tum thu a sawi.

"Hmarchhak biala inkal­pawhna changtlun lo lutuk hi nasa taka ngaihven ngai a ni a, hmun ṭhenkhat chu tlangram chhengchhe tak takte a nih vangin lirthei leh rel pawh a lut thei lo a ni," a ti.

"Thlawhtheihna service-ah mi tam tak an innghat a, hei vang hian airline te chu thlawhtheihna tam zawk service tir turin kan ngen a, an senso eng emaw chen tumsak kan inpeih reng a ni," tiin Singh chuan a sawi bawk.

Hmarchhak biala lirthei kawngpui leh rel kawng tihchangtlun chu thil pawimawh tak a nih thu Singh chuan a sawi bawk a, heihi nasa taka bawhzui mek a ni, a ti.

"Hmarchhak bialah hian hmun mawi mawi takte a awm a, hmun ṭhenkhat chu rampawna hmun tlawh chakawm tak tak angte an ni. Heng hmuna film siam turin Bollywood film siamtute kan sawm bawk ang," a ti.