CM Tuki-a'n khualzin te hip turin media a ngen

Arunachal Pradesh Chief Minister Nabam Tuki chuan khualzin mi tam zawk hip nan an state media te chu theihtawp chhuaha ṭang turin a ngen.

Frontier Films-in ‘News & Views’ leh ‘Frontier Films’ award semna inkhawm an buatsaihah Thawh­lehni khan Tuki chuan he thu hi a sawi a, "Media te'n tam zawka Aru­na­chal chanchin duhawm an tarlang a nih chuan India ram state dangte leh Arunachal Pradesh inkar hla lutuk chu tihzim theih a ni," a ti.

Chief Minister Tuki chuan award chu journalist leh film siam ṭhinte cho phurna atana bul ṭanna ṭha a ni, tiin Arunachal ṭhalaite'n he lamah hian talent ṭha tak tak nei mah se mihring an tlem avangin sumdawnna hlawk zawka kalpui a ni lo mai zawk a ni, a ti.

Media tihchangtlunna atana state sorkar hmalakna tarlangin sorkar laipui chuan national film and television institute zulzuiin Arunachal-ah Regional Film and Television Institute din a remtih thu a sawi a, hemi atan hian state sorkar chuan ram a ngaihtuah mek a ni, a ti.

"State sorkar chuan Regional Film and Television Institute dinna atan ram a ngaihtuah mek a, hei hian ṭhalaite tan hna thawh tur a siam­sak dawn a ni. State sor­kar chuan India ram leh rampawna film siamtute hip luh nan infrastructure tam zawk din a tum bawk a, hemi atan hian hma a la mek a ni," a ti.

Film siamtute hip nan policy duan an tum thu Tuki chuan a sawi bawk a, ‘Vision 2030 Document’ siam nan media mite chu state sorkar hnena rawtna thlen turin a ngen bawk.