DAN Legislature meeting neih a ni CM Zeliang-a'n Lok Sabha MP Rio a sawisel

Nagaland-a rorellai NPF kaihhruai Democratic Alliance of Nagaland (DAN) leh Naga People's Front Legislature party meeting chu Thawhṭanni khan a ruala neih a ni.

Meeting-ah hian Chief minister T.R.Zeliang chuan MLA 25 thlawptu a nei tih finfiah a ni. Zeliang-a thlawptu MLA te hi- NPF MLA 16, JD-U leh NCP MLA pakhat ve ve bakah Independent MLA pasarih te an ni.

Zeliang-a thlawptute hian a kaihhruaina an la rintawk thu tarlangin, NPF president leh DAN chairman ni bawk Shürhozelie Liezietsu pawh an la rintawk thu an tarlang bawk.

Media Officer to Chief Minister chuan meeting-ah hian DAN sorkara NPF thawhpui, BJP MLA pali te chu Delhi-a an zin vangin an tel theih loh thu a tarlang. Mahse BJP MLA, parliamentary secretary of transport Paiwang Konyak chuan fax-a lehkhathawnin, Legislature party meeting thu­tlukna chu eng pawh an pawm tur thu a tarlang.

Chief Minister Zeliang chuan meeting-ah hian thu sawiin, NPF MLA lungawilo hruaitute chuan MLA te chu thil dik lo hmanga beiseina siamsak an tum a, mipuite bum an tum a ni, a ti. Zeliang chuan Chief Minister hlui, Lok Sabha MP ni ta, Neiphiu Rio chu sawiselin, Rio chuan Delhi-a a thiltum a tihpuitlin theih loh avangin state sorkar chawhbuai a tum a, a duha a hrual theih tur Chief Minister dah a tum a ni, a ti.

Zeliang chuan MLA lung­awi lote hian India danpui chhala an thutiam an bawhchhia a ni, a ti a, an thil tih chu dan hmanga bawhzui ngai a ni, a ti.