CM Zeliang-a'n party buaina a chinfel ngei a ring

Nagaland Chief Minister TR Zeliang chuan politics thila tun hnaia Nagaland buaina chu dan hmanga a chinfel ngei a rin thu a sawi.

Zeliang chuan a laka hel, Naga Peoples's Front (NPF) MLA lungawi lote dawt thu thehdarh chuan a tihmangan thu sawiin, MLA lungawi lote'n Chief Minister a nihna ṭanga paihthlak an tum danah thudik a langchhuak mek a ni, a ti.

"Chief Minister mawhphurhna zahawm tak leh Chief Minister office humhim turin party worker ka nihna ang leh MLA ka nihna angin kalphung dik chu ka vawng tlat a ni," a ti.

MLA lungawi lote'n party legislature hruaitute thlak an phut chu Zeliang chuan assembly-a sorkar fiah a nih chauhin a chinfel theih a rin thu a sawi bawk.

"Governor office hnena a tihtur hriattir chu ka mawhphurhna a ni lo a, mahse Govenor leh Central-a BJP hruaitute chuan min rintawk ka ring tlat a ni," a ti.

NPF MLA lungawi lote'n sorkar paihthlak kan tum lo a, party legislature hruaitute thlak kan phut a ni, tia an sawi chungchangah Zeliang chuan MLA lungawi lote chu thudik lo hmanga mipuite leh Governor bum tumah a puh a, Govenor PB Acharya chu MLA lungawi lote nawrna ang zela a kal a rin loh thu a sawi bawk.

"Member 60 awmna assembly-a NPF kaihhruai DAN sorkarah member 52 ka nei a, hei vang hian sorkar tan engmah a hlauhawm loh a ni," a ti.

A nupui nen foreign bank account-ah cheng vaibelchhe 78.66 chuang an nei tia NPF MLA lungawi lote'n an puhnaah Zeliang chuan state home department-in rampawna sum chheprelh chu a rang lama chhuichiang turin Union Home Ministry a ngen thu a sawi.