Vawiinah Assam minister thar lalut dawn State sorkarin Land Acquisition Bill siam a tum

Assam Chief Minister Tarun Gogoi-a'n ministry a siksawia minister thar pariat a ruatte chu vawiin hian lakluh an ni ang.

Ministry siksawi chung­changa Congress president Sonia Gandhi hnena lehkha a thawnah Gogoi chuan Minister post li a ruah thu a sawi a, post ruak chu mu­nicipal leh town committee inthlan neih zawha ministry siksawi thawh hnihnaah hnawhkhah a nih tur thu a hriattir.

Gogoi chuan AICC gene­ral secretary (Assam in-charge) CP Joshi leh APCC president Anjan Dutta te a rawn hnuah a Council of Ministers-a tel tur MLA pariat a thlanchhuah thu a hriattir bawk.

Assam Chief Minister chuan Congress president Sonia hnena lehkha a thawnah minister pali an ban vangin an post a ruah thu a tarlang. Minister bang te hi Gogoi laka MLA lungawi lote hruaitu, Health Minister Himanta Biswa Sarma bakah Ardhendu Dey leh Siddique Ahmed te an ni a, Congress thawhpui BPF-in Congress an thlawpna an hnuhdawh avangin party MLA, Minister Chandan Brahma pawh a bang.

Gogoi chuan ministry a siksawi thawh khatnaah minister pariat paihthlak an nih chhan chu nikum Lok Sabha inthlana anmahni biala Congress party an chakpui zawh loh vang a ni, tiin Sonia a hriattir bawk.

Gogoi-a kaihhruai minis­try-a minister thar pariat lakluh tur te chu- Bhumidhar Barman, Sarat Barkataky, Chandan Sarkar, Sukur Ali, Atuwa Munda, Sumitra Patir, Girindra Mallik leh Bismita Gogoi te an ni.

Minister aṭanga paihthlakte hi- Prithibi Majhi, Akon Bora, Tanka Bahadur Rai, Gautam Roy, Nilmoni Sen Deka, Pradyut Bordoloi, Pranati Phukan leh Rajib Lochan Pegu te an ni.

Hetihlai hian Chief Minis­ter Gogoi chuan state sorkarin a hranin Land Acquisition Bill siam a tum thu leh, sorkar laipuiin tun hnaia Central Act, 2013 a amend chu Assam-a kalpui an tum loh thu a sawi.

"Land Acquisition Bill chu kan buaipui mek a, sorkar laipuiin Central Act a amend chu kan kalpui loh tur thu a hmain ka lo sawi tawh a ni," a ti.

Land Acquisition Bill chu March thlaa Budget Session neih turah putluh a ni dawn em tia thuthar thehdarhtute zawhna chu Gogoi chuan chhangin, March thlaa an putluh hman leh hman loh tur chu a hriat loh thu a sawi a, mahse bill chu Assam state tan bika siam ngei an tum thu a sawi.

Sorkar laipuiin Land Acquisition Act a amend chu Gogoi hian nasa tak­in a lo dodal tawh a, Act tihdanglamna chuan loneitute hamṭhatna nasa tak a tihchhiatsak a ni, a ti.

Chief Minister Gogoi chuan Assam sorkarin ṭha­lai hna nei lote tan hna siamsak a duh thu sawiin, hemi atan hian state sorkor chuan Assam-a industry thar hawn nan investment tam zawk a mamawh a ni, a ti. Mahse loneitute hamṭhatna chu khawih chingpensak an duh loh thu a sawi bawk.