M’laya HM-in a banna thehluh a hnukkir

Thla hnih kaltaa Congress kaihhruai sorkar aṭanga banna thehlut, Meghalaya Home Minister Roshan Warjri chuan a banna a hnukkir.

He thu hi Chief Minister Mukul Sangma chuan sawiin, Warjri-i'n bang tura a thutlukna lo siam tawh a sût chu lawmawm a tih thu a sawi.

"Home Minister a nihna aṭanga banna thehlut, Warjri-i'n cabinet minister a nihna chhunzawm tura thutlukna a siam hi ka lawm hle a ni," tiin Chief Minister Mukul chuan thuthar thehdarhtute a hrilh.

"Warjri chu a hna chhunzawm turin ka thlem a, ka sawmna min ngaih­pawi­mawhsakin Home Minister hna a chelh chhunzawm tur thu min hrilh a ni," a ti.

Meghalaya-a hmeichhe Home Minister hmasa ber, Warjri chuan Garo Hills-a dan leh thupek dinhmun tlakchhiat vanga mawhphurhna lain nikum, November 20 khan Chief Minister hnenah banna a thehlut a, mahse Chief Minister Mukul chuan a banna thehluh hi a pawmsak lo.

Hetihlai hian Mukul chuan ministry siksawi a tum thu a sawi bawk a, mahse a hun tur erawh a sawi lang lo.