Delhi-ah North East Justice Forum din a ni

Chi inthliarna lam hawia hmarchhak mite'n tihduhdah an tawrh ṭhin doletna atan tun hnai khan Delhi-ah North East Justice Forum din a ni.

Forum hi Arunachal Pradesh MP hlui, Takam Sanjoy-a kaihhruai­na hnuaiah din a ni a, ani hian hruai­tu mawhphurhna a la nghal.

Sanjoy chuan nikum January thlaa Delhi-a mi kut tuara thi, Arunachal zirlai Nido Tania-a pa, Nido Pavitra chu member pariat awmna, interim committee-ah member-a ruat a nih thu a sawi.

Forum hian meeting a neih hmasa berah Nido Tania tualthihna thubuai kaihhnawiha ST/SC Act tlawhchhana pawikhawihtute thubuai neih chu Central Bureau of Investigation (CBI) trial court-in a hlihsak avanga an lungawi loh thu tarlang.

ST/SC Act tlawhchanna pawi­khawihtute thubuai siamsak trial court-in a hlihsak chungchangah Nido Tania-a pa, Pavitra chuan Delhi High Court-ah petition a thehlut a, High Court chuan kumin January 9 khan CBI chu insawifiah turin a hriattir.

Justice Manmohan Singh awmna court bench chuan Nido Tania thattua rinhlelh- Farman, Pawan, Sunder Singh leh Sunny Uppal te chu trial court-in SC/ST Act tlawhchhana thubuai an neihte a hlihsak avangin insawifiah turin an hriattir bawk.

North East Justice Forum chuan meeting-ah hian hmarchhak mite venhimna atana Bezbaruah Committee rawtna, sorkar laipuiin January 2-a a kalpui ṭan chu an ennawn bawk a, Nidio Tania-a thihcham January 29 chu martar ni-a puan an tum. Forum chuan he ni pual hian Delhi-a, Janatar Mantar emaw Connaught Place-ah inkhawm buatsaih an tum bawk.