PM Modi-a'n India zalenna sualtute a zah lo: Tripura CPI-M

Tripura a rorellai party, Communist Party of India (Marxist) chuan Prime Minister Narendra Modi-a kaihhruai NDA sorkar chu India zalenna sualtute zah loah a puh.

Tripura CPI-M chuan Modi-a'n India Republic Day-ah US President Barak Obama chu khualliana sawmin, hei hi India zalenna sualtute zah lohna nasa tak a ni, an ti.

CPI-M thupuangtu Goutam Das chuan 'India ram awpbettute zingah US pawh a tel a, US chu mihring hmelma lian ber ram a ni a, Republic Day-ah US president chu khualliana sawm a ni bawk a, BJP chuan India an hmangaih loh zia an tilang leh ta a ni," a ti.

"Khawvel puma fir­fiaka chetna chawk chhuaktu chu US a ni a, hmar­chhak bial pawhin CIA te vangin helna nasa tak a hmachhawn mek a ni. Modi chuan Obama nen inpawhna ṭha siam tumin, India ram buaina hi tihpunlun a tum a ni. Hei hi kan pawm ngai lo ang," tiin Das chuan a sawi bawk.

Party thupuangtu Das chuan UPA sorkar laia Indo-US nuclear deal ziah tawh chu Modi hian chinfel thuai a duh a, hemi denchhen hian India rama US thiltum tihpuitlin nan Modi chuan Indian defense leh insurance-ah 49% foreign direct investment tih a phal a ni, a ti.

"BJP leh an pawl lo chhuahna Jansangha chuan India zalenna atana tha an thawh ve lo a, tunah thuneihna an chan hnuah India danpui innghahna kalphung hrang hrangte an thiltum tihpuitlin nan an palzut chho mek zel a ni," a ti.

Tripura CPI-M chuan Republic Day lawmnaa US president Obama khualliana sawm a nih vang hian vawiinah India rampumah lungawi lohna lantir an tum.