NPF-in party MLA lungawi lote party-a let turin a sawm

Shürhozelie Liezietsu-a kaihhruai Naga Peoples Front chuan a party MLA lungawi lo, Sovima Camp-a inkulh mekte chu kawng an kharsak hmain party-a let turin a ngen.

NPF media cell chuan thu­chhuah a siamah MLA lung­awi lote chuan thu belhchian dawl lo hmangin sorkar paih­thlak an tum a ni, a ti.

"Sorkar paihthlak tuma an hmalaknaah innghahna rintlak tak an nei tawh lo a, an hruaitute chuan MLA te chu camp-ah pawnchhuak thei loin an dah a, midang biakpawh an phalsal lo bawk. Hei hi democracy kalphung­ah chuan thil inhmeh lo tak a ni," tiin media cell thu­chhuak chuan a tarlang bawk.

Thuchhuak chuan Chief Minister hlui, MP Neiphiu Rio, Rajya Sabha MP Khekiho Zhimomi leh MLA lung­awi lote hruaitu, G. Kaito Aye te an fate leh chhung­te nupui pasala inneihna avangin chhungkhat hnai tak an ni a, heng mite hian state sorkar rorelna chu an chhungkaw rorelnaah siam an tum a ni, a ti.

MLA lungawi lo zinga Imkong L. Imchen, Khekiho Zhimomi leh Benjongliba chu minister an nih laia thu­buai nei an ni a, an thubuai te chu tun thlenga la chinfel loh an ni, tiin thuchhuak chuan a tarlang bawk.

NPF thuchhuak chuan Governor chu state Cabinet remtihnain sorkar fiah nan special session ko tura ngen a ni a, mahse MLA lungawi lote chuan floor-a sorkar fiah chu an ngam lo a ni, a ti a, politics thila an buaina chu assembly house pawn lama chinfel theih a nih loh thu a tarlang.

"MLA lungawi lote chuan bengchheng an siam thlawn mai a ni, eng ang pawh­in ṭang mah se an thil tum chu a hlawhtling dawn lo a, an MLA bial pawh an la chan phah dawn a ni," a ti.