Sorkar laipuiin mihringa sumdawn dona tichak dawn
Sorkar laipui chuan hmarchhak biala human trafficking dona tihchak nan Assam police te chu sum leh paia ṭanpui a tum.
Assam police official chuan state police te'n pawikhawihtu chu state pawn lam thlenga an umzui zel theih nan leh mihring an chhanchhuah theih nan sorkar laipui chuan sum a pek tur thu a sawi a, sum a pek tur pawh non-plan budget aṭangin a ruahman fel tawh, a ti.
Hemi rual hian Union Home Ministry chuan Assam police-a Criminal Investigation Department, anti-trafficking unit chu tun hnaia mihring chhanchhuahna beihpui an thlak tawh zat leh an chhanchhuahte hming kimchang zawka hriattir turin a ngen nghal bawk.
Police official chuan Assam Police-a anti-trafficking unit chu corpus fund a siamsak thu a sawi bawk.
Assam Police, anti-trafficking unit chuan mihringa sumdawnna thubuai a bawhzui theih nan leh rukbote chhanchhuah nan Ministry of Home Affairs hnenah ṭanpuina sum vawi eng emaw zat a lo dil tawh a, Assam state district tina unit te hnenah kumtin cheng nuai nga ṭheuh pe turin a ngen a ni.
Police official chuan human trafficking thubuai chu sum an neih loh avangin an bawhzui theih ṭhin loh thu a sawi bawk a, mi rukbote chhanchhuah beihpui thawh nan Social Welfare department chauhin fund an hmuh thu a sawi bawk. Mi rukbo zawn nan leh chhanchhuah beihpui an thlaknaa an senso chu an hmuh let ngai loh thu a sawi bawk.
Superintendent of Police (anti-trafficking unit) Violet Baruah chuan sorkar laipuiin ṭanpuina sum a pek chu anti-trafficking unit-in hma a sawn phah a beisei thu a sawi a, state pawna chhanchhuah hna thawh ṭumin, police te ei leh in bakah an veivahna senso chu police department sum aṭang ringawt chuan tumsak a harsat thu a sawi bawk.
Baruah-i chuan anti-trafficking unit ṭanpuina tur chungchang chu tun hnaia Ministry of Home Affairs-in meeting a koh ṭumin a sawi lan thu a sawi a, sorkar laipui chuan cheng nuai 1.75 a pek tawh thu leh district tina unit te tana cheng nuai nga ṭheuh an dil chu an hlawhtlin ngei a beisei thu a sawi bawk.