AHSEC-in syllabus 30% in titlem dawn
Assam Higher Secondary Education Council (AHSEC) chuan academic year 2020-21 atan High Secondary syllabus chu 30% in a titlem dawn.
Hri leng vanga zirna in khar a, zirlai naupangte hun rei tak zirna chhunzawm mumal thei loa an awm avangin an zirlai pawh hi tihtlemsak a ni dawn tih Council chuan a sawi a ni. AHSEC chuan academic standing committee nena meeting an neihpui hnuah academic year 2020-21 atan bik syllabus hi tihtlem an rel ta tih a sawi.
Hemi hma hian Central Board of Secondary Education (CBSE) chuan Class 9 -12 tan 2020-21 session-a syllabus chu 30% a tihtlem turin a lo rel tawh bawk.
Task force-in school hawn tur ngaihtuah dawn
Education minister Himanta Biswa Sarma chuan educationist leh intellectual-te awmna, education department hnuaia task force din chuan zirna in hawn tur chungchangah mipuite ngaihdan leh rawtna hrang hrangte awmte ngaihtuahin, school hawn hun tur hi a la rel dawn tih a sawi.
Sarma chuan, "September 1, 2020 aṭanga school hawng tur chuan kan inbuatsaih a, zirtirtute pawh Covid-19 test neihpui mek an ni bawk. Hemi chungchangah hian mipui leh pawl hrang hrang aṭangin rawtna tam tak kan dawng a, hengte hi education department task force chuan August 25 leh 26-ah ngaihtuahin, thutlukna pawh kan la siam leh dawn a ni," a ti.