Assam CM Gogoi-a'n ministry a siksawi Minister-ah mi 14 lakluh an ni

Assam Chief Minister Tarun Gogoi chuan kar kalta Zirtawpni khan ministry siksawiin, minister-ah mi 14 lakluh a ni a, minister-a lakluh zinga pariat chu mi thar an ni.

Minister 14 te zingah hian 11 chu cabinet minister an ni a, pa­thum chu minister of state niin, inde­pendent charge pek an ni.

Governor Padmanabha Balak­rishna Acharya chuan minister te hi rinawmna thu tiamtirin, a lalut a ni.

Chief Minister Gogoi-a ministry hian minister post pali a la ruak a, February thlaa municipal body leh town committee inthlanna neih zawhah hnawhkhah tum a ni.

Ministry hluia minister 14 te chu ministry siksawi a nih theih nan January 19 khan an bang a, an zinga pariat chu member thara thlak an ni.

Kum hnih kalta aṭang khan rorellai Congress party MLA zingah lungawi lo an awm a, party legislature hruaitu thlak phutin, hma an la a ni. MLA lungawi lote hruaitu Health Minister Himanta Biswa Sarma chuan nikum July 21 khan minister a nihna a ban phah a, a rualin a ṭhuihhruai minister pahnih chu Chief Minister Gogoi-a'n a ban bawk. Assam assembly-a Congress party thawhpui, Bodoland Peoples Front chuan Congress party nena kum 13 chuang an thawhhona chu nikum June 26 khan an titawp bawk a, party MLA, Chandan Brahma chuan Gogoi-a ministry-a minister a nihna aṭangin an ban phah bawk. Minister bang te vang hian minister post li a ruak.

Zirtawpnia minister thar lakluhna inkhawmah hian cabinet minister atana lakluh zingah Congress senior hotu, Bhumidhar Barman-a'n thu a tiam hmasa ber a, a hnuah Sarat Barkataky, Ajanta Neog, Nazrul Islam, Rockybul Hussain, Khorsing Engti, Chandan Sarkar, Sukur Ali, Ajit Singh, Basanta Das leh Atuwa Munda te'n rinawmna thu an tiam bawk. Minister of State (independent-charge) atana lakluhte chu- Girindra Mallik, Bismita Gogoi leh Sumitra Doley Patir te an ni.

Gogoi-a ministry tharah hian hmeichhe pathum an tel a, chungte chu Public Works Development Minister hlui Ajanta Neog leh a vawi khatna atana minister mawhphurhna la tu- Bismita Gogoi leh Sumitra Doley Patir te an ni.

Ministry tharah hian Chief Minister Gogoi cabinet minister hlui paruk a ruat nawn leh a, chungte chu- Ajanta Neog, Nazrul Islam, Rockybul Hussain, Khorsing Engti, Ajit Singh leh Basanta Das te an ni.

Minister lakluhna inkhawm neih zawhah Chief Minister Gogoi chuan chanchinthar theh­darhtute kawm nghalin, kum 2016-a state assembly inthlan neih turah Congress-in hnehna an chan ngei a rin thu a sawi a, February thlaa municipal body leh town committe inthlanna neih turah pawh an party chu an chet ṭhat ngei a beisei thu a sawi.

Gogoi chuan inthlanna neih turah minister pakhatin an party chu hnehna a chanpui theih loh thu sawiin, party worker zawng zawngte an ṭanrual a ngai a ni, a ti.

Ministry thar chuan mipuite tan hna a thawh tur thu sawiin Gogoi chuan minister hlui leh thar a ruatte chungah rinnna a nghah thu a sawi a, ministry thar a siamnaah sakhuana, hnam leh thil hrang hrang te chu kimchang taka ngaihtuah a ni, a ti.