CM Zeliang-a'n NPF MLA panga banna a pawm

Nagaland Chief Minister TR Zeliang chuan Naga People's Front (NPF) MLA panga te'n Parliamentary Secretary leh Advisor an nihna aṭanga banna an thehluh a pawm.

Hemi chungchangah hian Cabinet Secretariat (Cabinet Cell) chuan kar kalta Ningani khan hriattirna a chhuah a ni.

MLA panga te hian Chief Minister Zeliang-a laka MLA helte hruaitu, G Kaito Aye thlawpin January 8 khan banna an thehlut a, an rual hian NPF MLA parukin Nagaland sorkara chanvo hrang hrang an neih aṭangin banna an thehlut bawk.

Chief Minister chuan MLA pathum banna erawh a la pawmsak lo a, hetihlai hian Minister pahnih- PHE Minister Noke Wangnao leh Agriculture Minister Benjongliba te banna erawh Governor PB Acharya hnenah a thawn tawh a ni.

Nagaland assembly member 60 awmnaah G Kaito Aye-a thlawptu MLA lungawi lote hian NPF MLA 21 leh independent MLA pakhat thlawpna an nei niin an sawi a, Chief Minister Zeliang-a chuan NPF MLA 16, JD-U leh NCP MLA pakhat ve ve bakah Independent MLA pasarih thlawpna a nei niin a sawi thung