Mukul-a'n hmeichhe zirlaite infrastructure ṭha siamsak a duh

Prime Minister Narendra Modi-a'n “Beti Bachao, Beti Padhao” campaign (save daughter, educate daughter) a tlangzarh hnuah Meghalaya Chief Minister Mukul Sangma pawhin hmeichhe zirlaite tan educational infrastructure changtlung siam a duh thu a sawi.

Mukul chuan hmeichhe zirlai tlem lutuk chu a ngaihmawh thu a sawi a, harsatna awm chu state sorkar chuan theih­tawp chhuahin a bawhzui mek a ni, a ti.

Chief Minister Mukul chuan state sorkarin hmeichhia te tan bik school leh hostel te siam mah se infrastructure changtlung zawk dinsak an ngai a ni, a ti a, thingtlang lama zirna-in sang awm lo chu hmeichhiate'n khawpui an panna chhan a ni a, hei vang hian hmeichhiate tan hostel tam zawk hawn a ngai a ni, a ti.

Mukul chuan hmeichhiate tan hamṭhatna tam zawk siam a tum thu a sawi a, cheng vaibelchhe 100 senna tur, welfare scheme kalpui an tum thu a sawi.

Kum 2001 India ram chhiarpuiin a tarlan danin India ram naupang kum 6 hnuai lam sex ratio chu mipa 1,000 zelah hmeichhia 927 a ni a, kum 2011 chhiarpuiah hei hi tlahniam lehin, mipa 1,000 zelah hmeichhia 919 an ni.

UNICEF-in kum 2012-a report a siamah India chu child sex ratio-ah ram 195 zingah 41-naah a dah a ni.