Amnesty-in Sharmila-i thlavang a hauh

Amnesty International India chuan Manipur police te'n kar kalta Zirtawpni, January 23-a Irom Sharmila an man leh chu an dem thu an tarlang.

Manipur Court chuan January 23 khan Sharmila chu mahni intih­hlum tuma an puhna thubuaiah a thlah zalen a, mahse Sharmila hian Armed Forces (Special Powers) Act (AFSPA) hlih ngiata a chaw nghei a bansan duh loh avangin Manipur police te chuan an man leh nghal a ni.

Amnesty International India Programmes Director Shemeer Babu chuan, "Sharmila man a nih lehna hi India judicial system zah lohna a ni a, thla nga kalta chhung khan Sharmila hi chhuah zalen a nih hnuah vawi hnih man nawn leh a ni a, he thil hi kalphung mak danglam tak a ni," a ti.

Nikum August 19 khan Manipur Court chuan Sharmila chaw ngei chu politics thila nawrhna a ni a, danin a phal a ni, tiin a lo chhuah zalen tawh a, mahse ni thum hnuah chaw nghei a bansan loh vangin mahni intihhlum tuma puhin police te'n an man leh nghal.

Amnesty hotu Shemeer Babu chuan Sharmila hian a muan­awm zawngin a lungawi lohna a lantir a, hemi atan hian India danpui hnuiah dikna chanvo a nei a ni, a ti. "Chaw ngheia nawrh chu mahni intihhlum tumna a ni lo a, Court-in vawi eng maw zat a thubuai a hlihsak hnuah eng vangin nge sorkarin thubuai ngai bawk awrhtir leh?" a ti.

Manipur-a pawl hrang hrang- Just Peace Foundation (JPF), Human Rights Alert (HRA) leh Indigenous Perspective (IP) te pawhin Sharmila man a ni leh ta chu an dem thu tarlangin, sorkar thil tih dan chu misual anga Sharmila lantir tumna mai a ni, an ti.

Amnesty International India chuan sorkarin Sharmila a chhanhim duh a nih chuan amah man loin AFSPA a hlip zawk tur a ni, a ti a, chaw ngheia Sharmila-i nawrhnaah sorkar chuan inrawlh theihna a nei lo, a ti.

Sharmila hian sipai te thuneihna sang neihna dan, Armed Forces (Special Powers) Act hlih phutin kum 14 chuang chaw a nghei tawh a, Manipur sorkar chuan Indian Penal Code section 309 tlawhchhanin mahni intihhlum tumah a puh a, thubuai a siamsak a ni.

Nikum December khan Union Minister of State for Home Affairs Kiren Rijiju chuan sor­kar laipuiin IPC section 309 chu ṭhiah a tum thu a lo sawi tawh a, he dan hian mahni intihhlum tumte chu kum khat chhung lung in tang turin a hrem thei a ni.