Shillong Chamber Choir dintuin Padma Shri dawng dawn Assamese filmmaker Jahnu Barua-a'n Padma Bhushan

Shillong Chamber Choir dintu leh Director, Neil Herbert Nongkynrih chu Ministry of Home Affairs-in kar kalta Inrinni zana Padma Shri chawimawina dawng tur hming a puan zingah a tel.

Nongkynrih hian Art category bikah Padma Shri hi a dawng ang.

Nongkynrih bakah hian hmarchhak bial aṭangin Padma Shri dawng tur hian mi pali thlan an ni bawk a, chungte chu- Assam environmentalist Jadav Payeng, Assamese writer Lakshmi Nandan Bora, Manipur medicine expert Sarungbam Bimola Kumari Devi leh Arunachal Pradesh social worker H Thegtse Rinpoche te an ni.

Film siam lama rampum huap chawimawina lo dawng tawh Assamese filmmaker Jahnu Barua chu Padma Bhushan dawng tura thlan a ni bawk. Barua hian a hmain Padma Shri a lo dawng tawh bawk.

Shillong Chamber Choir Director Nongkynrih chuan chawimawina dawng tura thlan a ni chu lawmawm a tih thu sawiin, chawimawina chu zaipawl member te leh mipuite vanga dawng a ni, a ti.

Nongkynrih hian Shillong Chamber Choir hi kum 2002 khan a din a, India ram mai ni lo, khawvel hriatah zaipawl langsar a phochhuak a ni.

Kum 2010-a US President Barack Obama leh US First Lady Michelle Obama te'n India an lo tlawh ṭumin, Rashtrapati Bhawan-ah Shillong Chamber Choir hi an lo zai tawh a ni.