RBI-in Sikkim State Bank kal dan ngaimawh

Reserve Bank of India chuan State Bank of Sikkim chu Banking Regulation Act 1949 emaw Companies Act hnuaia khuahkhirh a nih loh avangin a ngaihmawh thu a tarlang.

RBI chuan sorkar laipui hnena lehkha a thawnah he thu hi tarlangin, State Bank of Sikkim chu eng bank thuneihna hnuaiah mah a awm lo, a ti.

RBI chuan State Bank of Sikkim balance sheet kum nga kalta khan audit loh a ni, a ti a, bank hming chu affiliated bank hming pang­ngai ang tak a nih vangin depositor te'n an hriatsual palh a hlauhthawn thu a tarlang bawk.

Hetihlai hian State Bank of Sikkim managing director, chief executive HK Chhetri chuan bank sum leh pai dinhmun chu tarlang loin, an harsatna chu state sorkar leh sorkar laipuiin an bawhzui mek, a ti.

Harsatna chu Sikkim-in kum 1975-a India a zawm aṭanga inṭan a ni, a ti a, Sikkim India danpui Article 371 F hnuaiah special status pek a ni a, bank kal danah pawh kalphung mumal tak siam a nih loh vang a ni, a ti.

State Bank of Sikkim hi kum 1968-a din a ni a, branch 35 neiin, state sorkar chu shareholder lian ber a ni.