NEIIPP hnuaia registration khapna hlip turin ngen

North East Industrial and Investment Promotion Policy (NEIIPP), 2007 hnuaia unit thar tana registration thar tih a khapna chu hlip turin Federation of Industry and Commerce of North Eastern Region (FINER)-in sorkar laipui a ngen.

FINER chairman R S Joshi chuan an ngenna hi kar kalta Inrinnia New Delhi-a DoNER Minister Jitendra Singh nen meeting an neih ṭumin a thlen a, registration thar tih khapna chu kum 2017-a NEIIPP 2007 tihtawp a nih hmain hlih a ṭul thu a sawi.

DoNER Minister Singh-a'n ‘Make in North-East’ campaign tlangzarh a nih tur thu a puan ṭum­in FINER chairman Joshi chuan NEIIPP 2007 chu tihtawp a nih chuan hmarchhak bial hmasawnna atana ASEAN ram nena thlunzawm tuma hmalaknaah harsatna a thlen a rin thu a lo sawi tawh bawk a, hmarchhaka industry lama hmalakna chuan ‘Make in India’ ruahmanna a nghawng a rin thu a sawi bawk.

Union Ministry of Commerce and Industry hnuaia Industrial Policy and Promotion department chuan nikum December-a hriattirna a tihchhuahah NEIPP 2007 hnuaia registration thar tih a khap a ni.

FINER chuan sorkar laipuiin registration thar tih a khap avangin industrial investment-a cheng vaibelchhe 30,000 hu chu a nghawng a rin thu a tarlang bawk.

NEIIPP 2007 chuan hmarchhak biala indus­trial activities hrang hrang­ah hamṭhatna eng emaw zat a siam a, inves­tor te'n hmarchhak indus­try-a investment an tih loh chuan industry ṭhanchhoh­nain a tuar dawn a ni, tiin FINER chuan a tarlang.