Bhalukpong-Tawang kawngpui kum 2016-ah peihfel dawn

Border Roads Organisation (BRO) Director General Lt Gen RM Mittal chuan India-China ramri venhimna atana ruahman Arunachal Pradesh-a kilometre 317.52-a thui, Bhalukpong-Tawang kawngpui sial mek chu kum 2016-a peihfel hman a nih tur thu a sawi.

"Tawang, Tenga leh Bomdila-a hnathawh endikna kan neih ṭumin BRO engineer leh hna thawkte'n theihtawp chhuahin hna an thawk tih ka hmu a, hei vang hian kum 2016-a an peihfel hman ngei ka beisei a ni," a ti.

Lt Gen Mittal chuan Prime Minister Narendra Modi-a'n Arunachal-a ramri kawngpui a ngaihpawimawh thu sawiin BRO-in BRO road project 18 a kalpui mekah project pariat chu hmarchhak biala awm a ni, a ti a, project pariat zinga pali chu Arunachal-a awm a nih thu a sawi bawk.

BRO Director General chuan tun hnaia Arunachal-a BRO kawngpui sial mek a endik chu hnathawhnaa harsatna awmte leh hnathawktute harsatna chinfelna atan a ni, a ti.

BRO DG Mittal hian BRO NE in-charge Maj Gen US Dadu leh Project Arunanak Chief Engineer Brig HK Pokhariyal hoin kilometre 221-a thui, Daporijo-Taksing road project kalpui mek an endik bawk a, Upper Subansiri district, Tama Chung Chung leh Reddi-a hnathawhna hmun chu ram chhengchhe tak ni mah se kawngpui siam ngei a nih tur thu a sawi.