Guwahati-ah ram chhunga River Ropeway thui ber hawng

Brahmaputra lui-a rope­way siam chu nimin khan state finance, health and family welfare minister Himanta Biswa Sarma leh GDD minister Sidhhartha Bhattachrya-ten an  hawng.

Ropeway hi Brahmaputra lui hmarlam leh chhimlam luikam inkalpawhna atana siam a ni a, km 2-a thui niin India rama River Ropeway thui ber a ni. A cabin-te hi Switzerland aṭanga lakluh an ni a, ṭum khatah passenger 32 an chuang thei dawn a, minute sarih chhung vel an thang ang. 

He ropeway siamna tur lungphum hi  kum 2006 khan phum a ni a, vawi tam tak hna hi chawlhsan lailawk a ni. He project atana sum senso hi cheng vaibelchhe 56.08 a ni. Kum 2006 khan project hi Guwahati Metropolitan Deve­lopment Authority (GMDA) hnenah pek a ni a, mahse kum 2008 khan Samir Damodor Ropeways Pvt Ltd hnenah hna hi pek leh a ni. 

Kum 2011 May thlaa hawn tur tih ni mah se, hna hi tihkhaihlak fo a nih avangin ruahman angin an thawk chak thei lo a ni. Hun rei tak tihkhawtlai a nih hnuah nimin khan an hawng thei ta a ni.